Niraxiponnachem Chintop ani Ulovp!

Niraxiponnachem Chintop ani Ulovp!

-Jose Salvador Fernandes

Dalgado Konknni Akademin (DKA) Poilem Konknni (Romi Lipi) Sahit'ya ani Sonvskrutichem itihasik Sommelon ghoddun haddit porian, Devonagori lipich zoi mhonnpeanchea pottant borench zoll'lam. Khorem mhonnlear, tankam bhirantecho kampero suttlolo asa. Tankam bhirant kosli? Konknnichea mollar Romi lipintlean fuddarak jem-jem aste-aste ghoddun ievpachem asa tachi. Te gozalichi tankam ekdom' bori zanniv asa hi gozal tea huskean bhorun bhitorlea bhitor gozali-khobro ani potrancher borovpam kortat tachevelean spoxtt ritin disun ieta.

Apunn Konknniche 'niz' mhalgodde (vo mal godde?) mhunn miroitolea devonagorivaleank tea Sommelonant sahitya ani sonvskruti soddun her soglem aslem oxem dista. Tem Sommelon mhonnlear dhormachea nanvan Konknni loka modem futt ghalpachem ek karosthan oxem tanchem chintop asa. Tea Sommelonak khuim dhormvadacho vas ieta. Tea Sommelona udexim sorkarachea duddvancho idvas kela oxem-i tanchem mhonn'nnem asa.

'Beauty lies in the eyes of the beholder' oxi inglezintlean ek mhonn'nni asa. Monis je gozalik aple nodrentlean polleta toxich taka khuim ti dista. Konnkni mollar Devnagorivaleamni Romi lipik sodanch hollduvim oklam lavun polleleant. Bhaxeche nodrentean Konknnichea mollar Romi lipintlean jem kitem uzvadda ieta vo ghoddta tantum Devnagorivaleank kednach Konknnichi udorgot ani boreponn pollevnk na. Poilem Konknni (Romi Lipi) Sahit'ya ani Sonvskrutichem itihasik Sommelon ghoddun haddlem tantum tankam Konknnichea boreponnache nodrentlean kainch mellunk na.Romi liintlean Konknnichea mollar kitem-i sahityache ani sonvskrutiche nodrentlean ghoddun ieta tednam tankam tantum sahitya ani sonvskruti soddun tankam her sogllem dista zalear tantum Romi lipicho koslo guneanv? "Xevttim, vozr (diamond) parkupak-ui nodor lagta, patrtai (qualification) lagta. Parkupich tor svotacho fator aslo ani to vozrak sado khoddo somzolo zalear to dox (defect) tea fatracho; vozracho nhoi!"

Soglleankuch khobor asa tea pormannem, Dalgado Konknni Akademin, Konknniche Romi lipichi chollvoll fuddem vhortana dhormachea nanvar kednach bhed-bhav korunk na. Kela zalear, konnem-i mhaka 'challenge' korum ieta, hanv tondd divnk raji asam. Toxem aslem zalear, DKA-cho poilo bhanddari (treasurer) Prabhakar Tendulkar DKA-cho pod-odhikari (office bearer) aspacho? Sodeak DKA-cho odheokx Premanand A Lotlikar asa to odheokxpodar aspacho? DKA-chem Poilem Konknni (Romi Lipi) Sahit'ya ani Sonvskrutichem itihasik Sommelon tacho Sekretar Tarkeshwar Naik asunk zatalo? Hache urfattem, Gőyant Konknnichea mollar jeo-jeo sonvstha asat tea podancher ani her zageancher Devnagorivaleamni podancher ani her panvddeancher dhormachim tonddam pollevn vavr choloila. Hachem khoreponn amkam Go Konkni Akademint, Konknni Bhaxa Mondollant, Dusrdorxancher, Akaxvannicher ani Konknnicho vavr cholvpachea her zageancher ugtea dolleamni disun ieta.He vixim konnak-ui tachem mon vicharlear to soroll hem ki dhormachea nanvan Konknni loka modem futt ghalpachem ek karosthan, he gozalik dhormvadacho vas ieta oxem mhonnlea ani sanglea viret ravchona. Konknnichea mollar dhormachea pakhea khal te oslim khotteponnam kortat tim ami tanche (Devnagrivaleanchea) nodrek haddun tonddar marlear, magir ami dhormvadi!

Tea Sommelona udexim sorkarachea duddvancho idvas kela oxem-i ek Devnagorivaleanchem mhonn'nnem asa. Sommelonacho khorch pollevpak DKA-cho bhanddari aslo, toch sogllo khorchacho vavr polleta. DKA-k khuim kitlo ani koslo khorch zata tacho, DKA-chea pod-odhikareank ani vavurpi somitik bhes-bori khobor asta. Poilem Konknni (Romi Lipi) Sahit'ya ani Sonvskrutichem Sommelonak kitlo ani koslo ortabhorit khorch zalo to-ui tankam khobor asa. Punn Sommelona udexim DKA-n khorch korun DKA-n sorkari duddvancho idvas kela oxem mhonnpak DKA-chea Sommelonachim bilam Devnagorivalea kodde konnem tori 'audit' korunk dilolea porim te uloitat. Konknnicheach bavttea khal ravun Romi lipintlem hem Sommelon kelem mhunn tankam DKA-n sorkari duddvancho idvas kelo dista. Ani Devnagorivale sorkari duddvamni apunn Sommelonam ani Porixodo ani Mohautsov kortat tednam tankam apunn duddvancho idvas korta oxem kiteak disonam? Sommelonam kortat tim tor duddvancho idvas oxem tankam dista zalear Devnagorivaleamni tim Sommelonam, Porixodeo adi. korpachim kiteak bond korunk nant? Vichar korpa sarki gozal!
Romi lipintlea Sommelonak lagun Devnagorivaleank bhirantecho kampero suttlolo asa oxem hanvem survatekuch mhonnlam..Oi! Tankam bhirant disunk laglea. Konknnichea mollar Romi lipintlean fuddarak jem-jem aste-aste ghoddun ievpachem asa tachi tankam atam sulus lagunk laglea. Konknnichea mollar her lipim vangdda Konknni bhaxechi sodanch bori ani khori udorgot zaum oxem mandit ailole DKA-n Devnagorik dhorun aiz meren khuinchech lipicho dusvas korunk na. Ani teach monan DKA aplo vavr fuddem vhorta, ani tachea vavrak borem foll mellpache dis lagim pavleat. Ani tika tor tem foll mell'lem zalear, Devonagorichem khatren luksonn zatolem hachem niraxiponn Devnagorivaleank poilench bhogunk laglam. Oi, ani heach niraxiponnantlean tankam bhirant disunk laglea. Mhunnonuch Devonagorivale Konknniche Romi lipicher sorv torechem vikh onkhtat.Punn vell ietoch tem tanchem vikh tankanch malpoddtolem. To vell ani dis pois na mhonnchem poddta!

23/1/2009

[As published in Gulf-Goans e-Newsletter under the caption "Sonvarachim Sungttam - a weekly Konkani column by Prof. Jose Salvador Fernandes].


gaspar.almeida